निजी क्षेत्रसँगको सहकार्यमा न्यानोपन चाहिन्छः राजस्व सचिव पुडासैनी
अखबार हब
काठमाडौं । सरकार तथा निजी क्षेत्रको सहकार्यवाट नै कोभिडका कारण सिर्जित आर्थिक समस्याबाट पार पाउन सकिने भएकोले सरकारले निजी क्षेत्रसंगको सहकार्यमा न्यानोपन चाहेको राजस्व सचिव रामशरण पुडासैनीले बताएका छन् ।
नेपाल उद्योग परिसंघ सँगको अन्तरक्रियामा ‘परिसंघमा परिचर्चा’ कार्यक्रममा बोल्दै पुडासैनीले उक्त कुरा बताएका हुन् ।
कार्यक्रमका विशेष अतिथि रहेका राजस्व सचिव रामशरण पुडासैनीले सरकारले निजी क्षेत्रसंगको सहकार्यलाई नविन सोचले अगाडि बढाउन खोजेको बताउँदै अब पहिलेको जस्तो अविश्वासको वातावरण कायम नरहेको समेत उल्लेख गरे ।
भन्सार, राजस्व लगायतका मन्त्रालयसंग सम्बन्धित सम्पूर्ण कार्यहरु सहज तरिकाले सम्पादन भई रहेको जनाउँदै कोहि कसैले उद्योगी व्यवसायीलाई दुःख दिने नियत राखेको भए समेत त्यो लामो समय नरहने उनको भनाई थियो ।
सरकार मुलुकमा औद्योगिक प्रवद्र्धनको लागि खुला रुपले अगाडि आएकोले निजी क्षेत्रले समेत लगानी बढाउँदै लैजान आवश्यक छ । परिसंघले यहाँ उठाएका सबै विषयहरु मननयोग्य छन् यि मध्य कतिपय विषयहरु नेपाल राजस्व परामर्श समितिमा समेत छलफलमा रहेकाले छिटै सम्बोधन हुने छन् उन्ले भने । अर्थमन्त्रालय आगामी आर्थिक वर्षको बजेटको निर्माणमा जुटी सकेकोले तत्काल समाधान गर्न नसकिने विषयहरुलाई बजेट मार्फत समेत सम्बोधन गर्ने मन्त्रालयको प्रयास रहने उनले बताए । परिसंघले मेक इन को अवधारणालाई अभियानको रुपमा अघि बढाउन खोजेकोमा सह्राना गर्दै नेपाल सरकारले यसमा पूर्ण समर्थन गर्ने प्रतिबद्धता समेत जनाए ।
उक्त अन्तरक्रियामा नेपाल उद्योग परिसंघका अध्यक्ष सतिशकुमार मोर , भन्सार विभागका महानिर्देशक सुमन दाहाल , आन्तरिक राजस्व विभागका कार्यवाहक महानिर्देशक गजेन्द्र ठाकुर, परिसंघका निवर्तमान अध्यक्ष हरिभक्त शर्मा लगायतका ब्यक्तिहरुको सहभागिता रहेको थियो ।
