सुस्मिता हत्याकाण्डः अरुण कार्की पुर्पक्षको लागि थुनामा
अखबार हब
मकवानपुर । हेटौँडा उपमाहानगरपालिका वडा नं. –४ कर्राकी सुस्मिता केसी (थापा)को हत्या आरोपमा सुस्मिताको जेठी नन्द दुर्गा कार्कीको श्रीमान अरुण कार्की जिल्ला अदालत मकवानपुरमा हाजिर भएका छन् । सोमबार जिल्ला अदालतमा हाजिर भएपछि उनलाई प्रहरीले हिरासतमा लिएर राखेको थियो ।
मंगलबार न्यायाधीस सिता शर्मा अधिकारीको एकल इजलासले अरुण कार्कीलाई पुर्पक्षको लागि थुनामा राख्न आदेश गरेकोे जिल्ला अदालत मकावनपुरका श्रेस्तेदार तिर्थराज भट्टराईले जानकारी दिए । थुनछेक बहस भएसँगै उनलाई थुनामा राख्न आदेश भएको थियो ।
यसअघि बुहारी सुस्मिता थापाको हत्या आरोपमा उनको ससुरा प्रकाश थापा, सासू तुलसाकुमारी थापा, जेठी नन्द दुर्गा थापा कार्की र कान्छी नन्द सीता थापालाई पुर्पक्षको लागि कारागार पठाइएको थियो । फरार रहेका अरुण कार्की आफै अदालतमा हाजिर भएसँगै सुस्मिता हत्याकाण्डमा आरोपितहरु सबै पक्राउ परिसकेको छ । आजको समृद्धसमाज दैनिकमा खबर छ ।
