कांग्रेसभित्रको विवादले बागमतीमा रोकियो मन्त्रीको शपथ
अखबार हब
हेटौंडा । नेपाली कांग्रेसभित्रको विवादले बागमती प्रदेशमा मन्त्रीको शपथ स्थगित भएको छ ।
मन्त्री नियुक्तिको विषयमा कांग्रेसभित्रको विवाद र नेकपा एमालेको असहमतिले बिहीबार साँझ सवा ५ बजेलाई तय भएको मन्त्रीहरूको शपथ स्थगित भएको मुख्यमन्त्री हो ।
मुख्यमन्त्री बहादुर सिं लामाले बिहीबार आफ्नो दल कांग्रेसबाट प्रभात तामाङ, सुरजचन्द्र लामिछाने, मीनकृष्ण महर्जन र बिमल ठकुरी मन्त्री नियुक्त गरेका थिए । प्रभातलाई आर्थिक मामिला तथा योजना, सुरजचन्द्रलाई आन्तरिक मामिला तथा कानुन, मीनकृष्णलाई युवा तथा खेलकुद र बिमललाई संस्कृति पर्यटन तथा सहकारी मन्त्रालयको जिम्मेवारी दिइएको छ ।
बुधबार मन्त्री नियुक्त भएका कुन्दनराज काफ्लेलाई सामाजिक विकास र श्यामबहादुर खड्कालाई खानेपानी, ऊर्जा तथा सिँचाइ मन्त्रालयको जिम्मेवारी दिइएको छ । कांग्रेसबाट बुधबार नै मन्त्री भएका मदुकुमार श्रेष्ठले भने मन्त्रालय पाएका छैनन् ।
कांग्रेसबाट नवनियुक्त सामाजिक विकासमन्त्री कुन्दनराज काफ्लेले आर्थिक मामिला तथा योजना मन्त्रालय मागेका छन् । काफ्लेले यसअघि भौतिक पूर्वाधार मन्त्रालय मागेका थिए ।
कांग्रेसले पहिला लगाइसकेको भागबण्डा परिवर्तन गरी भौतिक पूर्वाधार मन्त्रालय एमालेलाई दिएर आर्थिक मामिला मन्त्रालय लिएको थियो । आफूलाई सामाजिक विकास मन्त्रालय नियुक्त गरेको खबरपछि काफ्ले प्रदेश प्रमुख कार्यालयमै आएर मुख्यमन्त्री लामासँग असन्तुष्टि पोखेका थिए । उनले आधा घण्टा भन्दा बढी समय लामासँग वार्ता गरेर भर्खरै प्रदेश प्रमुख कार्यालयबाट निस्किएका छन् । वार्ता सकारात्मक नभएको बुझिएको छ ।
यसैगरी मुख्यमन्त्री लामाले सल्लाह नगरी मन्त्री थपेको भन्दै एमालेले असहमति राखेको छ । शपथ कार्यक्रमकै लागि प्रदेश प्रमुख कार्यालय आएका एमाले दलका नेता जगन्नाथ थपलियाले मन्त्री थप्ने एकल निर्णयप्रति असहमति राख्दै बाहिरिएका थिए ।
एमालेले मन्त्रालय फुटाएर मन्त्रालय संख्या बढाउन नदिनेबारे लामालाई थपलियाले स्पष्ट पारेको छलफलमा सहभागी स्रोतले भन्यो ।
मुख्यमन्त्री लामाले आफ्नै दल कांग्रेसका तर्फबाट चार मन्त्री नियुक्त गरेको पत्र लिएर शपथ अघि मात्रै प्रदेश प्रमुख कार्यालयमा आएका थिए ।
१४ सदस्यीय मन्त्रिपरिषद्मा एमालेबाट प्रकाश श्रेष्ठ कृषि, अमनकुमार मास्के भौतिक पूर्वाधार, किरण थापा मगर स्वास्थ्य, कृष्णप्रसाद सिलवाल वन, प्रेमभक्त महर्जन श्रम रोजगार र शुकमाया तामाङ उद्योगमन्त्री छन् ।
