खोलाले बगाएर मकवानपुरमा एक जनाको मृत्यु
अखबार हब२०८१ श्रावण २७, आईतवार १९:४९
हेटौंडा । मकवानपुरको पूर्वी क्षेत्रस्थित बकैया गाउँपालिकामा खोलाले बगाएर एक जनाको मृत्यु भएको छ ।
बकैया गाउँपालिका–५ पावसस्थित सिमात खोलाले बगाएर ६५ वर्षीय आशाकाजी दोङको आइतबार मृत्यु भएको जिल्ला प्रहरी कार्यालय मकवानपुरले जानकारी दिएको छ ।
उनी १० बजे घरबाट पैसा झिक्न भन्दै चेक बोकेर बैंक भएको ठाउँ गरगरे बजारतर्फ हिँडेका थिए ।
स्थानीय दूध संकलन केन्द्रले दूधको १३ हजार रुपैयाँ जम्मा गरिदिएकाले बकैयाको गरगरेस्थित कृषि विकास बैंकमा पैसा झिक्न जाने क्रममा खोलाले बगाएको इलाका प्रहरी कार्यालय फापरबारीका इञ्चार्ज प्रहरी निरीक्षक नारायण थापाले बताए ।
खोलाले दोङलाई बगाएर करिब ७ सय मिटर तल पुर्याएको थियो ।
