मनहरीका गौतमको साथबाट ५१ हजार रुपैँया चोरी, ३ जना पक्राउ
अखबार हब
हेटौंडा । मकवानपुर प्रहरीले गएराति चोरीको आरोपमा तीन जनालाई पक्राउ गरेको छ ।
गएराति अन्दाजि ११ बजेको समयमा हेटौंडाबाट लोथर जाँदै गरेको ना ५ ख ८१०१ नम्बरको बसमा सवार रहेका मकवानपुरको मनहरी गाउँपालिका वडा नम्बर– ६ बस्ने ४९ वर्षीय भरत गौतमको साथमा रहेको ५१ हजार रुपैँया चोरी गरेको अभियोगमा प्रहरीले उनीहरुलाई पक्राउ गरेको हो ।
पक्राउ पर्नेमा सोहि बसमा सवार सिन्धुपाल्चोक लिसंखु पाखर गाउँपालिका वडा नं। ६ बस्ने ३२ वर्षीय लाक्पा तामाङ, उदयपुर जिल्लाको त्रियुगा नगरपालिका वडा नं। १० बस्ने ४२ वर्षीय प्रेम दोर्जे शेर्पा र धनकुटा छथर गाउँपालिका वडा नम्बर– ३ बस्ने ३७ वर्षीय हेमराज श्रेष्ठ रहेका छन् ।
हुलियाको आधारमा शंका लागि खानतलासी गर्दा उनीहरुका साथबाट चोरी भएको रकम फेला परेको प्रहरीले जनाएको छ ।
प्रहरीले दोर्जे शेर्पाको साथबाट १ लाख ६९ हजार ७१० रुपैयाँ, तामाङको साथबाट ३९ हजार रुपैयाँ र श्रेष्ठको साथबाट ५ हजार ७७० रुपैयाँ बरामद गरेको छ ।
पक्राउ परेका तीनैजनाले चोरी गरेको स्वीकारेको प्रहरीले जानकारी दिएको छ ।
चोरीको अभियोगमा पक्राउ परेका उनीहरुलाई आवश्यक कारवाहिको प्रक्रिया अगाडि बढाइएको प्रहरीले जनाएको छ ।
