कैलाशका प्रजा भिमफेदीमा मृत फेला

हेटौंडा । मकवानपुरको भिमफेदी गाउँपालिका-२ रिठेडाँडामा बृद्व मृत अवस्थामा फेला परेको छ । मकवानपुरको कैलाश गाउँपालिका–७, भार्ताका ७० वर्षीय टिकाराम प्रजा भीमफेदी गाउँपालिका–२, रिठेडाँडामा मृत फेला परेको हो ।

सोमबार ११:३० बजेको समयमा प्रजाको शव भेटिएको जिल्ला प्रहरी कार्यालय मकवानपुरले जानकारी दिएको छ ।
प्रजाको शव सडे–गलेको अवस्थामा फेला परेको प्रहरीले जनाएको छ ।

प्रहरीका अनुसार गत कात्तिक १४ गते भीमफेदी–९ मा भाञ्जी पम्फा चेपाङको घर जाने क्रममा प्रजा हराएका थिए । टिकरामका भाञ्जा रामहरी प्रजाले मंसीर ४ गते जिल्ला प्रहरी कार्यालय मकवानपुरमा आफ्नो मामाको खोजी गरिदिन निवेदन दर्ता गराएका थिए । मृतकले लगाएको कपडा र साथमा रहेको झोलाको आधारमा सनाखत गरेको प्रहरीले जनाएको छ ।