मकवानपुरगढीमा चितुवा र बाघको आतंक, स्थानीय त्रसित
अखबार हब
हेटौंडा । मकवानपुरको मकवानपुरगढी क्षेत्रमा चितुवा र बाघ देखापरेपछि स्थानीयवासी त्रसित बनेका छन्।
डिभिजन वन कार्यालय मकवानपुरले केही दिनदेखि सतर्क रहन आग्रह गरिरहेको अवस्थामा पछिल्लो घटनाले स्थानीय त्रसित बनेको हो ।
बिहीबार साँझ मकवानपुरगढी-३ का स्थानीय विशाल लुङ्वा चितुवाको आक्रमणबाट बचेका छन्। उनले सामाजिक सञ्जालमार्फत आफू मोटरसाइकलमा घर फर्कने क्रममा मकवानपुरगढी-३, कालीखोलामा चितुवाको आक्रमणमा परेको बताएका छन्। मोटरसाइकलसँग ठोक्किएपछि चितुवा जंगलतर्फ भागेपछि उनी जोगिन सफल भएका थिए।
यसअघि, बुधबार मकवानपुरगढी-६ मा बाघले स्थानीयको बाख्रा मारेको घटना सार्वजनिक भएको थियो। जंगली वन्यजन्तुको बढ्दो चहलपहलले स्थानीयवासीलाई त्रासमा राखेको छ भने डिभिजन वन कार्यालय मकवानपुरले जनतालाई सचेत रहन र आवश्यक सतर्कता अपनाउन आग्रह गरेको छ।
वन कार्यालयका अनुसार, चितुवा र बाघको गतिविधि बढिरहेकोले स्थानीयलाई राति यात्रा गर्दा सावधानी अपनाउन, एक्लै जंगल क्षेत्रतर्फ नजान, पशुचौपाया सुरक्षित राख्नु र कुनै असामान्य गतिविधि देखिएमा तुरुन्तै सम्बन्धित निकायमा जानकारी गराउन भनेको छ।
