करको दरमा पुनःविचार गर्न हेटौंडा उपमहानगरलाई सहकारी सञ्जालको अनुरोध
अखबार हब
हेटौंडा। हेटौंडा उपमहानगरपालिकाले करको दरमा अब्यवहारिक रुपमा बृद्दि गरेको भन्दै पुनःविचारको लागि सहकारी सञ्जाल मकवानपुरले नगर प्रमुख र उपप्रमुखको ध्यानाकर्षण गराएको छ ।
मकवानपुर जिल्ला सहकारी संघका अध्यक्ष नारायणप्रसाद देवकोटाको अध्यक्षतामा मंगलबार हेटौंडामा बसेको जिल्ला सहकारी सञ्जालको बैठकले सो कर सहकारी संघ संस्थाको हितमा नभएकोले पुनः बिचार गर्नको लागि ध्यानाकर्षण गराउने निर्णय गरेको थियो ।
सोही अनुसार सहकारी सञ्जाल मकवानपुरले बुधबार हेटौंडा उपमहानगरपालिकाको कार्यालयमा बुझाएको ध्यानकर्षण पत्रमा “सहकारी क्षेत्रको आर्थिक अवस्था जटिल भईरहेको समयमा सरोकारवालाहरुसंग बिना परामर्श एकपक्षिय रुपमा अबैज्ञानिक र अब्यवहारिक रुपमा बृद्धि भएको ब्यवसाय करलाई ब्यवहारिक र एकरुपता कायम गर्नका लागि अविलम्ब करको दर पुर्नबिचार गर्न अनुरोध गर्दछौ ।” उल्लेख गरिएको छ ।
गत नगरसभाले हेटौंडा उपमहानगरपालिकामा रहेका बहुउद्देश्यीय सहकारी संघ संस्थाहरुलाई बार्षिक १२ हजार रुपैँया, बचत तथा ऋण सहकारी संघ संस्थाहरुलाई ८ हजार रुपैँया, अन्य सहकारी संघ संस्थाहरुलाई ५ हजार, दुग्ध उत्पादक र कृषि सहकारी संघ संस्थाहरुलाई १ हजार पाँच सय रुपैँया व्यवसाय कर निर्धारण गरेको थियो ।
अघिल्लो वर्ष उपमहानगरपालिकाले सबै बिषयका सहकारी संघ संस्थाका लागि समान २ हजार ५ सय रुपैंया व्यवसाय कर लिने गरेको थियो ।
सहकारी सञ्जाल मकवानपुरले दुग्ध उत्पादक र कृषि सहकारी संघ संस्थाहरुलाई उपमहानगरपालिकाले गत बर्षभन्दा ब्यवशाय कर घटाएकोमा धन्यवाद दिँदै बाँकी संघ संस्थाहरुको हकमा बृद्धि गरिएको करको दरलाई घटाई दुग्ध उत्पादक र कृषि सहकारी संघकै समान दर कायम गर्न अनुरोध गरिएको छ ।
ध्यानाकर्षण पत्र बुझ्दै नगर प्रमुख मिना कुमारी लामाले करको दरलाई अर्को नगरसभाबाट परिमार्जन गर्ने बताईन् ।
त्यस्तै उपप्रमुख राजेश बानिँयाले सहकारी संघ संस्थाको ब्यवशाय कर निर्धारणको सन्दर्भमा सहकारी सञ्जालको सुझावलाई आत्मसाथ गरि अगाडि बढ्ने बताए ।
ध्यानाकर्षण पत्र बुझाउने क्रममा मकवानपुर जिल्ला सहकारी संघका अध्यक्ष नारायणप्रसाद देवकोटा, राष्ट्रिय सहकारी महासंघका सञ्चालक बद्रीप्रसाद लम्साल, जिल्ला बचत तथा ऋण सहकारी संघ मकवानपुरकी अध्यक्ष कल्पना श्रेष्ठ, मकवानपुर जिल्ला बहुद्देश्यिय सहकारी संघका अध्यक्ष रामहरि न्यौपाने, मकवानपुर जिल्ला दुग्ध उत्पादक सहकारी संघ लि।का अध्यक्ष हरिप्रसाद कडेल, जिल्ला कृषि सहकारी संघका मकवानपुरकी उपाध्यक्ष रेखा खतिवडा, राष्ट्रिय सहकारी बैकं बागमती प्रदेश कार्यालय प्रमुख रामेश्वर अर्याल, नेफ्स्कुन, फिल्ड कार्यालय हेटौडाका ईञ्चार्ज बिदुर खड्का लगायतको उपस्थिति रहेको थियो ।
