हेटौंडादेखि सौराहासम्म साइकल यात्रा
अखबार हब
हेटौंडा । स्वास्थ्य, वातावरण तथा पर्यटन प्रवर्द्धन गर्ने उद्देश्यले ‘राइड हेटौंडा टु सौराहा– २०८२’ साइकल यात्रा आगामी वैशाख १२ र १३ गते आयोजना हुने भएको छ।
साइकल सिटी हेटौंडाको मुख्य आयोजनामा हुने उक्त कार्यक्रमबारे आइतबार पत्रकार सम्मेलनमार्फत जानकारी गराइएको हो।
बागमती प्रदेश सरकारको संस्कृति तथा पर्यटन मन्त्रालय र आर्थिक मामिला तथा योजना मन्त्रालयको सहकार्यमा हुन लागेको यस कार्यक्रममा देशभरका ४३ जिल्लाबाट करिब ५०० जना साइकल यात्री (राइडर) सहभागी हुने अनुमान गरिएको छ। साइकल सिटी हेटौंडाका अध्यक्ष लेखनाथ ढकालका अनुसार जुनसुकै उमेर समूहका इच्छुक साइकल प्रेमीले नाम दर्ता गरी कार्यक्रममा सहभागी हुन सक्नेछन्।
साइकल यात्रा हेटौंडा उपमहानगरपालिकादेखि चितवन जिल्लाको सौराहासम्म ७५ किलोमिटरको दुरीमा तय गरिएको छ। आयोजकका अनुसार बाहिरी जिल्लाबाट आउने सहभागीहरूको लागि खानपान तथा बसोबासको उचित व्यवस्था मिलाइनेछ।
कार्यक्रम सफल बनाउन करिब २४ लाख रुपैयाँ खर्च हुने अनुमान गरिएको छ। पर्यटन प्रवर्द्धन, स्वस्थ जीवनशैली र वातावरणीय चेतना अभिवृद्धि गर्ने उद्देश्यले आयोजना गरिने यो साइकल यात्रा हेटौंडा र सौराहाको पर्यटन क्षेत्रलाई थप उचाइमा पुर्याउने अपेक्षा गरिएको छ।
